Psalms 33
Te Godigo nogi ugwaba sabo balia po dao
1Te doloba pai we bidi dabe,dagego te Genuai Bidigo tigidali
sę yalide te wiegi yai homu pemene yao.
Dage te Godigo po wali pabo we bidi,
dagego te Godigo nogi ugwaba siąo,
te dolo naga dao.
2Te musik po kulelego weyu,
te Godigo nogi ugwaba sao.
Te nogo si string elalubo gita eliyu, te musik agaba wao.
3Te gesi tęąbi po wao.
Te gita bugagia eliyu, tama wiegi yai musik mu weyu,
tama bomonama i dali wao.
4Magi baso meni, te Genuai Bidigo
po da te mu po tama dao.
Agai te doloba pai kolesaga wali peyu,
te tigidali sę ebo dao.
5Genuai Bidigo te wiegi yai kolesaga tigidali me,
tama te doloba pai kolesaga tigidali
te wei homu ebo dao.
Sesemane sogo Genuai Bidigo
te tǫde we bidi tigidali wei eyu, godolo ebo dao.
6Genuai Bidi Godigo te po naga obadi,
tama te giliga, me polua, me hǫ dabe
te dagalude pedelai.
Awe, agai po naga obaso, tama tigidali nai te ogwade
pedelai dao.
7Agai te tamu ąį selama, te deliba naga sisinani,
te bidigo te deli sene sospende naga
te wę tabibo tiwai gilama yali.
Agai te tamu ąi page te aga pesagede
aiyadu mu elalumainu yai.
8Te tigidali tǫde bage te Genuai Bidide wi elama,
tama aga dologode bidimainu yao.
9Magi baso meni, agai po naga obaso,
tama te tǫ pedelali.
Agai bomai po waligo, tama tigidali nai elalubao.
10Genuai Bidigo te we bidi hani dabego
homu kolesaga te olo tama hagamainu yaibao.
Mu tama, te bidi dabego po miyu,
te magi nai me deli nigaiba wali,
tama agai augwaligo te sę yabo paliyu,
tama te sę mu egobeo.
11Tiali goli, Genuai Bidigo te sę yao po wali da,
teda agai po te sesemane bomo elaluaibao.
Agai te mena sę me deli yabo
homu eyu da, tama te homu yali
te sesemane elalua peyu, elalua pabo dao.
12Te hani dabe augwa God te Genuai Bidi bidibao,
augwa te wiegi yai homu pemene iyąo.
Te bage te aga da olama sa muani bage,
te augwa wiegi yai homu pemene yao.
13God te dagalude bidu, tama aiyaba tonalubao.
Agai te tigidali tǫde we bidi subo dao.
14Aga te king aga pesagede bidibao,
tama te tigidali tǫde we bidiba
aiyaba tonalubo dao.
15Aga digi te tigidali we bidigo
homu kolesaga pedalumainu ilibo dao,
tama te augwaligo ebo kolesaga
tigidali konebo dao.
16Te hwįbode te we bidi hanigo kingo
te boi bidi aiyaba elaluama,
tama te genuai ami dabede naga
te boi bidi dabe me sela sągobeo.
Te ami dabe augwa bomogo digi
te boi bidi aiyaba me elalugobeo.
17Te hwįbo hos dabego te ami dabe tau sobaso,
te hwįbo aiyaba elaluainu ebaso, usu egobeo.
Tama te hosgo bomogo naga te ami
te hwįbode hagabo ma sainu ebaso, usu me egobeo.
18Tiali goli, odao.
Genuai Bidigo te aga dologode bidibo
we bidi tonalubo dao.
Awe, te agai te da godolo ebo kolesaga ebo siligobeo
homu ebo we bidi, te augwali agai
bugagia tonalubo dao.
19Agai te we bidi dabe augwali tonalu,
te augwali me isigobeo.
Tama agai augwali te nasi ebo sogo nai mayu yaibao,
te augwali bidibo ula dali bidimainu yaibao.
20Te da Genuai Bidigo tau sabo te dago tonalubao.
Genuai Bidigo naga da tau sabo da.
Aga te hwįbo sabele tiwai elama,
tama da agade duala sabo dao.
21Dago konealubo homu agai
wiegi yai nogide dąų obao.
Tama tiyu, dago agade
wiegi yai homu pemene yao.
22Genuai Bidi, dago konealubo homu dąų olama,
tama nago da tau sabo tonalubao.
Nago te olo tau sabo wiegi yai kolesaga
daba sesemane sogo yao.
Copyright information for
MPS